Macau Internet Censorship Test

本測試始於2025年9月28日0時0分，​我哋會持續更新呢個頁面，提供最新報告。

我哋團隊測試嗰陣，發現澳門有輕微嘅網絡封鎖：

​用緊中國電信澳門（CTMO）網絡嘅時候，中國電信澳門對：

1.​Snapchat官網做咗DNS污染，呢個係完全封鎖。

2.​Telegram官網做咗TCP連接攔截，呢個係間歇性封鎖。

目前冇任何關於澳門網絡封鎖嘅報告，我哋都係第一次發現呢個問題。

​因為我哋暫時未測試澳門電訊（CTM）、MTel電信同埋和記（3Macau）嘅網絡，所以測試樣本唔夠，未可以下定論。

​我哋會進一步跟進，睇下今次測到嘅網絡審查係中國電信澳門（CTMO）做嘅封鎖，定係全澳門嘅網絡都做咗特定嘅封鎖處理。

​OONI測試報告如下：

我哋手動測試嗰陣發現，Snapchat嘅官網完全入唔到，但係個App同IP載入功能正常，證實咗係DNS方面出咗問題，並非係TCP或UDP嘅深入封鎖。

​我哋手動測試嗰陣發現，Telegram嘅官網載入速度好慢，試咗十次，其中三次好快入到，五次載入得好慢，兩次載入失敗。

有趣嘅係，轉用香港網絡之後，入Telegram官網嘅速度明顯快咗，而且可以好快入到Snapchat官網，證明香港並冇針對Snapchat同Telegram做封鎖，用OONI做嘅測試都可以證明到呢一點。

​網上面話澳門冇網絡封鎖嘅講法係唔準確嘅，澳門係有網絡封鎖，只係澳門嘅網絡用戶都幾少，亦都好少個人或者機構喺澳門做網絡測試。

​但就算係咁，澳門依然係中國網絡審查封鎖最輕微嘅地區。

暫時未知澳門點解要針對Snapchat同Telegram做封鎖，亦都唔知呢個行為只係封鎖定係禁止，但考慮到Telegram入面有大量違反澳門法例嘅內容，呢個封鎖行為都可理解。但點解要對Snapchat做封鎖，而且力度仲大過Telegram呢？

​我哋喺大灣區做咗測試：
目前Snapchat官網被廣東、澳門網絡完全封鎖，App被廣東網絡完全封鎖。
目前Telegram官網被廣東網絡完全封鎖、被澳門網絡間歇性封鎖，App被廣東網絡完全封鎖。

我哋分別用咗和記（3HK）、電訊盈科（PCCW/HKT+CSL）、中國移動香港（CMHK）、數碼通（SmarTone）嘅網絡，同埋DATA WING伺服器網絡嚟測試，得出嘅結論係：香港網絡並冇對Telegram同Snapchat作出任何封鎖行為。

​我哋喺唔同時間再試過，結果都一樣，所以可以肯定個封鎖問題唔係因為網絡唔穩定，或者server維護緊嘅可能性。

而家澳門嘅封鎖情況：
對Snapchat官網：DNS污染，完全封鎖，運行於解析伺服器，封鎖難易度低、封鎖力度大。
對Telegram官網：中間人注入TCP RST封包，間歇性封鎖，運行於防火牆，封鎖難易度高、封鎖力度小。

而家廣東嘅封鎖情況：
對Snapchat官網同APP：DNS污染、針對TLS嘅SNI阻斷、TCP包同UDP包深度檢測封鎖（包括TCP RST注入）、規律性封鎖、無規律性封鎖、密文破譯、概率性中斷用家網絡，完全封鎖，運行於防火牆及出口節點，封鎖難易度高、封鎖力度大。
對Telegram官網同APP：DNS污染、針對TLS嘅SNI阻斷、TCP包同UDP包深度檢測封鎖（包括TCP RST注入）、規律性封鎖、無規律性封鎖、密文破譯、概率性中斷用家網絡，完全封鎖，運行於防火牆及出口節點，封鎖難易度高、封鎖力度大。

而家香港嘅封鎖情況：
對Snapchat及Telegram冇封鎖處理。

今次嘅測試結果唔代表澳門嘅網絡有封鎖其他網站，亦都唔代表香港嘅網絡就冇封鎖其他網站。